暴風雪號航天飛機

出自維基百科,自由嘅百科全書
跳去: 定向搵嘢
暴風雪號航天飛機發射升空
搭載暴風雪號航天飛機嘅能源號火箭
搭載暴風雪號航天飛機嘅安-225運輸機

暴風雪號航天飛機(俄文:БуранГРАУ正式編號11Ф35 К1)係蘇聯製造嘅一架航天飛機,亦都係暴風雪計劃裡面唯一投入使用過嘅航天飛機。喺1993年暴風雪計劃被俄羅斯當局腰斬之前,暴風雪號淨係進行過一次無人飛行[1]

設計[編輯]

暴風雪號航天飛機嘅設計,同美國嘅穿梭機相似,但係亦都有兩個重要差異:

  1. 美國嘅穿梭機將主引擎裝喺穿梭機上面,外接一個巨大嘅燃料箱。但係暴風雪號就將主引擎裝徂喺負責發射嘅能源號火箭(俄文:Энергия)上面,飛機上面褪出來空間用來裝輔助引擎。因此,暴風雪號降落嘅時候,就算第一次著陸唔成功,都可以用輔助引擎推動重飛、兜個圈、調整姿態再著陸多次,而美國嘅穿梭機著陸就只能夠一次成功;
  2. 美國嘅穿梭機採用垂直運輸,運到發射塔之後可以好快升空。而暴風雪號採用水平運輸,運到發射塔之後重要戙起身先至可以升空,無美國嘅穿梭機咁方便。

歷史[編輯]

暴風雪號航天飛機紀念郵票

1970年代年代末期,蘇聯認為美國極有可能用穿梭機運載同投放核武器,於是決定開發自己嘅航天飛機作為回應。中央機械製造研究院(俄文Центральный научно-исследовательский институт машиностроения,縮寫「ЦНИИМаш」)受命主導蘇聯航天飛機嘅研發,而軍方亦都從其他設計局調徂一批設計師過去幫手。計劃嘅代號係「暴風雪」,除徂航天飛機本身之外,亦都負責研究運載火箭同專用運輸機,成果分別有能源號火箭同埋安-225運輸機

1988年11月15號UTC凌晨3點,暴風雪號航天飛機喺哈薩克拜哥努勒發射場升空,執行無人操縱試飛任務[2]。喺用徂206分鐘圍著地球飛徂兩圈之後,暴風雪號喺拜哥努勒發射場嘅跑道自動著陸。雖然當時嘅側風達到每秒17米,但係暴風雪號淨係向側超出預定停機位置3米,向前淨係超出10米[2]。當時,發射嘅錄影帶只有一小部份被人公開徂,而公開嘅部份亦都拍攝唔到發射嘅真實情況,於是有人質疑暴風雪號根本無發射到,淨係被安-225帶徂上天然後飛徂返發射場——當年美國嘅企業號穿梭機亦都係恁樣試飛嘅。為徂平息疑慮,蘇聯當局決定公開全部錄影,證明暴風雪號真係發射徂[3][4]。蘇聯傳媒重話當時天氣好惡劣[3]

之後蘇聯當局曾經計劃喺1993年再用暴風雪號進行一次無人飛行,預計會喺太空停留15到20日[5]。但係蘇聯解體之後,俄羅斯聯邦航天局腰斬徂成個暴風雪計劃[5]

參考[編輯]

  1. "Buran". NASA. 1997年11月12號. 喺2006年8月15號搵到. 
  2. 2.0 2.1 Chertok, Boris (2005年). Asif A. Siddiqi, 編. Raketi i lyudi (火箭與人類) (PDF). NASA History Series. 第 179頁. 喺2006-07-03搵到. 
  3. 3.0 3.1 "影片:蘇聯穿梭機暴風雪號升空". vunet.ru. 喺2006-09-13搵到. 
  4. 唔同角度拍攝嘅暴風雪號升空畫面
  5. 5.0 5.1 "Экипажи "Бурана" Несбывшиеся планы.". buran.ru. 喺2006-08-05搵到.  (俄文)